വൈക്കം: ഉദയനാപുരം ഗ്രാമപഞ്ചായത്ത് ഒന്‍പതാം വാര്‍ഡായ ചെട്ടിമംഗലത്തെ ഉപതെരഞ്ഞെടുപ്പില്‍ എല്‍.ഡി.എഫിന് ഉജ്ജ്വല വിജയം. യു.ഡി.എഫിനു ലഭിച്ച വോട്ടുകളെക്കാള്‍ ആറു വോട്ടുകളുടെ അധികം ഭൂരിപക്ഷത്തോടെയാണ് എല്‍.ഡി.എഫിലെ സി.പി.എം അംഗം രശ്മി വിജയിച്ചത്. എല്‍.ഡി.എഫ് സ്ഥാനാര്‍ത്ഥിയായ രശ്മിക്ക് 548 വോട്ട് ലഭിച്ചു. കോണ്‍ഗ്രസിലെ സ്മിതയ്ക്ക് 271 വോട്ടും, ബി.ഡി.ജെ.എസിലെ ദീപയ്ക്ക് 121 വോട്ടും ലഭിച്ചു. ബി.ഡി.ജെ.എസ് സ്ഥാനാര്‍ത്ഥികള്‍ മത്സരിക്കുന്നിടത്തെല്ലാം നേട്ടമുണ്ടാക്കുന്നത് എല്‍.ഡി.എഫ് ആണെന്ന് ഒരിക്കല്‍ക്കൂടി അടിവരയിടുന്നതാണ് തെരഞ്ഞെടുപ്പ് ഫലം. കഴിഞ്ഞ ദിവസം നടന്ന കൊതവറ ബാങ്ക് തെരഞ്ഞെടുപ്പിലും ബി.ഡി.ജെ.എസിന്റെ പ്രചരണം കൊണ്ട് ഇടതുപക്ഷമാണ് നേട്ടമുണ്ടാക്കിയത്. കഷ്ടിച്ചാണ് കോണ്‍ഗ്രസിന് ഇവിടെ ഭരണം ലഭിച്ചത്.