വൈക്കത്ത് കൃഷിഭവന്റെ വിഷു ചന്ത തുടങ്ങി
13/04/2024
വൈക്കം കൃഷി ഭവന്റെ കീഴില്‍ തുടങ്ങിയ വൈ ബയോ വിഷു ചന്ത കൃഷി അസി. ഡയറക്ടര്‍ സി.കെ സിമ്മി ഉദ്ഘാടനം ചെയ്യുന്നു.
വൈക്കം: വൈക്കം കൃഷി ഭവന്റെ കീഴിലുള്ള വൈ ബയോ ആഴ്ച ചന്തയുടെ നേതൃത്വത്തില്‍ വിഷു പച്ചക്കറി ചന്ത തുറന്നു. പരമാവധി ജൈവ ഉല്‍പന്നങ്ങള്‍ സമാഹരിച്ച് ജനങ്ങളിലേക്ക് എത്തിക്കുക എന്ന ലക്ഷ്യത്തോടെ കര്‍ഷകര്‍ ഉല്‍പാദിപ്പിച്ച ഉല്പന്നങ്ങളും വിവിധ മേഖലയിലെ കര്‍ഷകരില്‍ നിന്നും സമാഹരിച്ച ഉല്പന്നങ്ങളും ശേഖരിച്ചാണ് ചന്തം നടത്തുന്നത്. സര്‍ക്കാരിന്റെ 'ഞങ്ങളും കൃഷിയിലേക്ക് ' എന്ന പദ്ധതിയില്‍പ്പെടുത്തി ഓരോ പഞ്ചായത്തുകളിലും കര്‍ഷക കൂട്ടങ്ങള്‍ ഉല്‍പാദിപ്പിച്ച ഉല്പന്നങ്ങളും വിപണിയില്‍ ഉള്‍പ്പെടുത്തിയിട്ടുണ്ട്. വൈക്കം കൃഷി അസി. ഡയറക്ടര്‍ സി.കെ സിമ്മി വിഷു ചന്ത ഉദ്ഘാടനം ചെയ്തു. പ്രസിഡന്റ് കെ.പി വേണുഗോപാല്‍ അധ്യക്ഷത വഹിച്ചു. കൃഷി ഉദ്യോഗസ്ഥരായ നിമിഷാ കുര്യന്‍, മെയ്സണ്‍ മുരളി, വൈ ബയോ സെക്രട്ടറി കെ.വി പവിത്രന്‍, സൊസൈറ്റി അംഗങ്ങളായ ഉണ്ണികൃഷ്ണന്‍, മോഹനന്‍, സുധാകരന്‍ കാലാക്കല്‍, കെ.കെ വിജയപ്പന്‍, കെ.കെ മനോജ്, സുരേന്ദ്രന്‍ എന്നിവര്‍ പ്രസംഗിച്ചു.