അമ്മയുടെ ചികിത്സയ്ക്കായി പഞ്ചായത്ത് സമാഹരിച്ച തുക ഒടുവില്‍ മകളുടെ സംരക്ഷണത്തിനായി മാറ്റി.
09/06/2017
സനിയമ്മ ചികിത്സാസഹായസമിതി സമാഹരിച്ച തുക സനിയമ്മയുടെ വേര്‍പാടുമൂലം മകള്‍ അശ്വിനി ഷാജിക്ക് പഞ്ചായത്ത് പ്രസിഡന്റ് റ്റി അനില്‍കുമാര്‍ കൈമാറുന്നു
വൈക്കം: അമ്മയുടെ ചികിത്സയ്ക്കായി പഞ്ചായത്ത് സമാഹരിച്ച തുക ഒടുവില്‍ മകളുടെ സംരക്ഷണത്തിനായി മാറ്റി. ഇരുവൃക്കകളും തകരാറിലായ പള്ളിപ്രത്തുശ്ശേരി കോട്ടച്ചിറ കായിപ്പുറത്ത് സനിയമ്മ(43) യുടെ വൃക്കമാറ്റി വയ്ക്കല്‍ ചികിത്സക്കായാണ് പഞ്ചായത്തിന്റെ നേതൃത്വത്തില്‍ ജനങ്ങള്‍ ഒത്തുകൂടി തുക സമാഹരിച്ചത്. വൃക്ക മാറ്റിവയ്ക്കല്‍ ശസ്ത്രക്രിയയ്ക്ക് ദിവസങ്ങള്‍ എത്തും മുന്‍പേ സനിയമ്മ ലോകത്തോട് വിട പറഞ്ഞു. സനിയമ്മയുടെ മരണത്തോടെ അച്ഛനും അമ്മയും ഇല്ലാതായ ഏക മകളും വിദ്യാര്‍ത്ഥിനിയുമായ അശ്വിനി ഷാജി (14) യുടെ സംരക്ഷണത്തിനായി തുക മാറ്റാന്‍ ചികിത്സാ സഹായ സമിതി തീരുമാനിച്ചു. സനിയമ്മയുടെ ചികിത്സയുടെ ചെലവ് കഴിഞ്ഞ് മിച്ചം വന്ന എട്ടുലക്ഷത്തി മുപ്പതിനായിരം രൂപ ബാങ്കില്‍ നിക്ഷേപിച്ച് അശ്വിനി ഷാജിയ്ക്ക് സംരക്ഷണമേകുകയാണ്. ഗ്രാമ പഞ്ചായത്ത് പ്രസിഡന്റ് റ്റി അനില്‍കുമാര്‍ രേഖ അശ്വിനി ഷാജിയ്ക്ക് കൈമാറി. പഞ്ചായത്ത് വൈസ് പ്രസിഡന്റ് ജീന തോമസ്, ബ്ലോക്ക് പഞ്ചായത്ത് മെമ്പര്‍ കെ എന്‍ നടേശന്‍, സഹായസമിതി കണ്‍വീനര്‍ ടി കെ മനോഹരന്‍, കെ ആര്‍ സഹജന്‍, എം എസ് രാമചന്ദ്രന്‍, സജീവ് വാസുദേവന്‍, സുനില്‍കുമാര്‍ എന്നിവര്‍ പങ്കെടുത്തു.