ഉദയനാപുരം സെന്റ് ജോസഫ് ദേവാലയത്തില്‍ തിരുനാളിന് കൊടിയേറി
02/05/2024
ഉദയനാപുരം സെന്റ് ജോസഫ് ദേവാലയത്തില്‍ വിശുദ്ധ യൗസേപ്പിതാവിന്റെ ദര്‍ശന തിരുനാളിന് വികാരി ഫാ. ജോഷി ചിറക്കല്‍ കൊടിയേറ്റുന്നു.
വൈക്കം: ഉദയനാപുരം സെന്റ് ജോസഫ് ദേവാലയത്തില്‍ വിശുദ്ധ യൗസേപ്പിതാവിന്റെ ദര്‍ശന തിരുനാളിന് വ്യാഴാഴ്ച രാവിലെ വികാരി ഫാ. ജോഷി ചിറക്കല്‍ കൊടിയേറ്റി. കൊതവറ സെന്റ് സേവ്യേഴ്‌സ് പള്ളി വികാരി ഫാ. ഷിജോ കോനുപ്പറമ്പന്‍ സഹകാര്‍മികനായി. അള്‍താരയില്‍ വച്ച് വെഞ്ചരിച്ച കൊടിക്കൂറ പ്രദക്ഷിണമായി കൊടിമര ചുവട്ടിലേക്ക് എഴുന്നള്ളിച്ചു. തിരുനാള്‍ കമ്മിറ്റി കണ്‍വീനര്‍ ജോര്‍ജ് വരമ്പിനകം, കൈകാരന്‍മാരായ ബെന്നി ദേവസ്യ, എല്‍സമ്മ തങ്കച്ചന്‍, പാരീഷ് കൗണ്‍സില്‍ സെക്രട്ടറി ഡെയ്‌സി എബ്രഹാം, വൈസ് ചെയര്‍മാന്‍ സജീവ് ഫ്രാന്‍സിസ്, സെക്രട്ടറി ഡാലസ് അഗസ്റ്റിന്‍, ട്രഷറര്‍ മാത്യൂസ് തെക്കേവല്യാറ, തോമസ് പതിനാറുപറ എന്നിവര്‍ നേതൃത്വം നല്‍കി.
വിവിധ ദിവസങ്ങളില്‍ വിശുദ്ധ കുര്‍ബാന, ആരാധന, ലൈത്തോരന്‍മാരുടെ വാഴ്ച, ദിവ്യകാരുണ്യ പ്രദക്ഷിണം, പൊതുആരാധന, പട്ടണംചുറ്റി പ്രദക്ഷിണം എന്നിവ പ്രധാന ചടങ്ങുകളാണ്. ഇടവകയിലെ എല്ലാ കുടുംബാംഗങ്ങളും ചേര്‍ന്നാണ് ഈ വര്‍ഷത്തെ തിരുനാള്‍ ആഘോഷിക്കുന്നത്. സമാപന ദിവസം എല്ലാ കുടുംബാംഗങ്ങളും പങ്കെടുക്കുന്ന പൊതുവാര്‍ഷികവും കലാപരിപാടികളും സ്നേഹവിരുന്നും ഒരുക്കിയിട്ടുണ്ട്.