കേരള സ്റ്റേറ്റ് റീട്ടെയില് റേഷന് ഡീലേഴ്സ് അസ്സോസിയേഷന് വൈക്കം താലൂക്ക് കമ്മറ്റി സമ്മേളനം
04/04/2017
വൈക്കം: കേരള സ്റ്റേറ്റ് റീട്ടെയില് റേഷന് ഡീലേഴ്സ് അസ്സോസിയേഷന് വൈക്കം താലൂക്ക് കമ്മറ്റി സമ്മേളനം വ്യാപാരഭവനില് ചേര്ന്നു. 1971-ലെ ദാരിദ്ര്യനിര്മ്മാര്ജ്ജന പദ്ധതിപ്രകാരം ഇന്ത്യാ ഗവണ്മെന്റ് പ്രഖ്യാപിച്ച 'ഗരിബി ഘടാവോ' എന്ന മുദ്രാവാക്യം അനുസരിച്ച് കേരളത്തിലും ഈ നിയമം നടപ്പില് വരുകയും ഓരോ ജില്ലയിലെയും ഒരു താലൂക്കിനെ ഫുഡ് കോര്പ്പറേഷന് ഏറ്റെടുക്കുകയും ചെയ്തിട്ടുള്ളതാണ്. ഇതനുസരിച്ച് കോട്ടയം ജില്ലയില് വൈക്കം താലൂക്കിനെയാണ് ഏറ്റെടുത്തിരിക്കുന്നതും ഈ നിയമം ഇപ്പോഴും നിലനില്ക്കുന്നതുമാണ്. കര്ഷകതൊഴിലാളികളും, കയര് തൊഴിലാളികളും, കൈത്തറി, ചെത്ത്, പായനെയ്ത്ത്, മണ്പാത്ര നിര്മ്മാണം ഉള്പ്പെടെയുള്ള നിരവധി തൊഴിലാളി വിഭാഗങ്ങള് അധിവസിക്കുന്ന ഒരു താലൂക്കാണ് വൈക്കം. ഇത്രയേറെ തൊഴിലാളികള് താമസിക്കുന്ന വൈക്കം താലൂക്കിനെ സാമ്പത്തികമായി മുന്നോക്കം നില്ക്കുന്ന മറ്റു താലൂക്കുകള്ക്കൊപ്പം കാണക്കാക്കാതെ റേഷന് മുന്ഗണനാപട്ടികയില് സംസ്ഥാനത്തെ പൊതുവായ ശതമാന കണക്കില് നിന്നും വേറിട്ടു കാണണമെന്നും മുന്തിയ പരിഗണന നല്കണമെന്നും സമ്മേളനം പ്രമേയത്തിലൂടെ സര്ക്കാരിനോട് ആവശ്യപ്പെട്ടു. സമ്മേളനം നഗരസഭ ചെയര്മാന് എന് അനില് ബിശ്വാസ് ഉദ്ഘാടനം ചെയ്തു. സംസ്ഥാന സെക്രട്ടറി ഷിജീര് ആലപ്പുഴ, ജില്ലാ പ്രസിഡന്റ് ജയിംസ് വാക്കോല, സെക്രട്ടറി ഷാനവാസ്, കെ സി നവീന്ദ്രലാല്, കെ പി മണി, ജിനേഷ്, സാബു, ജിനന്, ഇന്ദു പുഷ്ക്കരന്, ഷീജ, ചാണ്ടിക്കുഞ്ഞ് എന്നിവര് പ്രസംഗിച്ചു. പുതിയ ഭാരവാഹികളായി ആര് ബിജു (പ്രസിഡന്റ്), കെ സി നവീന്ദ്രലാല് (വര്ക്കിംഗ് പ്രസിഡന്റ്), കെ പി മണി (സെക്രട്ടറി), ചാണ്ടിക്കുഞ്ഞ് (ഖജാന്ജി) എന്നിവരെ തിരഞ്ഞെടുത്തു.