വൈക്കം : അഷ്ടമി മഹോത്സവത്തിന് മുന്നോടിയായി എന്‍.എസ്.എസ് നേതൃത്വത്തില്‍ നടന്ന കുലവാഴ പുറപ്പാട് ഭക്തിസാന്ദ്രമായി. വൈകുന്നേരം നാലിന് നീണ്ടൂര്‍മന ധര്‍മശാസ്താക്ഷേത്രത്തില്‍ പൂജകള്‍ നടത്തിയശേഷം പുറപ്പെട്ട ഘോഷയാത്ര മഹാദേവ ക്ഷേത്രത്തില്‍ എത്തി കൊടിമരച്ചുവട്ടില്‍ താലങ്ങളും വാഴക്കുലകളും കരിക്കിന്‍കുലകളും സമര്‍പ്പിച്ചു. പിന്നീട് ക്ഷേത്രത്തിലെ പ്രധാന ഭാഗങ്ങളില്‍ കരിക്കിന്‍കുലകളും വാഴക്കുലകളും കെട്ടി അലങ്കരിച്ചു. അഷ്ടമി ഉത്സവത്തിന്റെ കൊടിയേററിന് മുന്നോടിയായി ക്ഷേത്രം വര്‍ണാഭമാക്കുവാന്‍ നടത്തുന്ന ചടങ്ങാണ് കുലവാഴ പുറപ്പാട്. 1634-ാം നമ്പര്‍ പടിഞ്ഞാററുംചേരി പടിഞ്ഞാറെമുറി പത്മനാഭപിള്ള മെമ്മോറിയല്‍ എന്‍.എസ്.എസ് കരയോഗമാണ് ഇക്കുറി കുലവാഴപ്പുറപ്പാടിന് ആതിഥേയത്വം വഹിച്ചത്. താലൂക്ക് എന്‍.എസ്.എസ് യൂണിയന്റെ സഹകരണത്തോടെ ടൗണ്‍ മേഖലയിലെ 1573-ാം നമ്പര്‍ വൈക്കം നടുവിലെമുറി, 1603-ാം നമ്പര്‍ കിഴക്കുംചേരി തെക്കേമുറി, 1820-ാം നമ്പര്‍ പടിഞ്ഞാറെമുറി തെക്കേമുറി, 1878-ാം നമ്പര്‍ കിഴക്കുംചേരി വടക്കേമുറി, 1880-ാം നമ്പര്‍ പടിഞ്ഞാററുംചേരി വടക്കേമുറി എന്നീ കരയോഗങ്ങളുടെ നേതൃത്വത്തിലാണ് കുലവാഴ പുറപ്പാടും താലപ്പൊലിയും നടത്തിയത്. പഞ്ചവാദ്യം, ചെണ്ടമേളം, നെററിപ്പട്ടം കെട്ടിയ ഗജവീരന്‍മാര്‍, കലാരൂപങ്ങള്‍ എന്നിവയുടെ അകമ്പടിയോടെ കുലവാഴകളും, കരിക്കിന്‍കുലകളും ക്ഷേത്രത്തിലേക്ക് എത്തിച്ചു. നീണ്ടൂര്‍മന ക്ഷേത്രത്തില്‍ നിന്നും മടിയത്തറ, കൊച്ചുകവല, കച്ചേരിക്കവല, പടിഞ്ഞാറെനട, വടക്കേനടയില്‍ക്കൂടിയാണ് കുലവാഴ പുറപ്പാട് മഹാദേവ ക്ഷേത്രത്തില്‍ പ്രവേശിച്ചത്. ഘോഷയാത്രയില്‍ കേരളീയ വേഷമണിഞ്ഞ് ആയിരക്കണക്കിന് വനിതകള്‍ പങ്കെടുത്തു.