ദര്‍ശനപുണ്യമായി വൈക്കത്തഷ്ടമി;. ഒഴുകിയെത്തിയത് ഭക്തജനസഞ്ചയം
05/12/2023
വൈക്കം മഹാദേവ ക്ഷേത്രത്തില്‍ അഷ്ടമി ദര്‍ശനത്തിനായി നട തുറന്നപ്പോള്‍.
വൈക്കം: അഷ്ടമി ദിനത്തില്‍ സര്‍വാഭരണ വിഭൂഷിതമായ വൈക്കത്തപ്പന്റെ മോഹനരൂപം ദര്‍ശിച്ച് സായൂജ്യം നേടാന്‍ എത്തിയത് ആയിരങ്ങള്‍. പതിനൊന്നാം ഉത്സവ നാളിലെ വിളക്കെഴുന്നള്ളിപ്പ് ശ്രീകോവിലിലേക്ക് കയറുമ്പോള്‍ തന്നെ അഷ്ടമി തൊഴാനുള്ള ഭക്തരുടെ നീണ്ട നിര കാണാമായിരുന്നു. ചൊവ്വാഴ്ച പുലര്‍ച്ചെ 3.30ന് തന്ത്രി കിഴക്കിനിയേടത്ത് ഭദ്രകാളി മറ്റപ്പള്ളി നാരായണന്‍ നമ്പൂതിരി, മേക്കാട് മാധവന്‍ നമ്പൂതിരി, മേല്‍ശാന്തി ടി.ഡി നാരായണന്‍ നമ്പൂതിരി, ടി.എസ് നാരായണന്‍ നമ്പൂതിരി, അനൂപ് നമ്പൂതിരി, ശ്രീധരന്‍ നമ്പൂതിരി എന്നിവരുടെ കാര്‍മികത്വത്തില്‍ ഉഷഃപൂജ, എതൃത്തപൂജ എന്നിവക്കുശേഷം അഷ്ടമി ദര്‍ശനത്തിനായി നട തുറന്നപ്പോള്‍ വേദമന്ത്രോച്ചാരണവും പഞ്ചാക്ഷരിമന്ത്രവും ഉയര്‍ന്നു. 4.30ന് ആരംഭിച്ച ദര്‍ശനം ഉച്ചക്ക് രണ്ടു വരെ നീണ്ടു. വൈക്കം മഹാദേവ ക്ഷേത്രത്തിലെ കിഴക്കു ഭാഗത്തുള്ള ആല്‍ത്തറയില്‍ തപസ്സനുഷ്ഠിച്ച വ്യാഘ്രപാദ മഹര്‍ഷിയ്ക്ക് പരമേശ്വരന്‍ പാര്‍വതി സമേതനായി ദര്‍ശനം നല്‍കി അനുഗ്രഹിച്ച മുഹൂര്‍ത്തത്തിലാണ് അഷ്ടമി ദര്‍ശനം കൊണ്ടാടുന്നത്. ബുധനാഴ്ച വൈകിട്ട് ആറിനാണ് അഷ്ടമി ഉത്സവത്തിന് സമാപനം കുറിച്ചുകൊണ്ടുള്ള ആറാട്ടെഴുന്നള്ളിപ്പ്. രാത്രി ഒന്‍പതിന് ഉദയനാപുരം സുബ്രഹ്‌മണ്യസ്വാമി ക്ഷേത്രത്തില്‍ കൂടിപ്പൂജ വിളക്കും ഉണ്ടാകും. വ്യാഴാഴ്ചയാണ് മുക്കുടി നിവേദ്യം.