ചെമ്പ് കാട്ടിക്കുന്ന് തുരുത്ത് പാലം നിര്മാണം അന്തിമഘട്ടത്തില്
08/06/2023
ചെമ്പ് പഞ്ചായത്തിലെ കാട്ടിക്കുന്ന് തുരുത്ത് പാലത്തിന്റെ നിര്മാണ പുരോഗതി സി.കെ ആശ എംഎല്എ വിലയിരുത്തുന്നു.
തലയോലപ്പറമ്പ്: ചെമ്പ് പഞ്ചായത്തിലെ കാട്ടിക്കുന്ന് തുരുത്ത് നിവാസികളുടെ പാലത്തിനായുള്ള കാത്തിരിപ്പുകള്ക്ക് വിരാമമാകുന്നു. സംസ്ഥാന സര്ക്കാര് അനുവദിച്ച 8.60 കോടി രൂപ വിനിയോഗിച്ചുള്ള പാലത്തിന്റെ നിര്മാണം അന്തിമഘട്ടത്തിലാണ്. അപ്രോച്ച് റോഡിന്റെ നിര്മാണം കൂടി പൂര്ത്തിയായാല് പാലത്തിലൂടെ മറുകര കടക്കാം. 114.6 മീറ്റര് നീളവും 6.50 മീറ്റര് വീതിയിലുമായി 7 സ്പാനോടുകൂടി നിര്മിക്കുന്ന പാലത്തിന് 9 ഗര്ഡര് ബീമുകളും 24 പൈലുകളുമാണ് പൊതുമരാമത്ത് വകുപ്പ് വിഭാവനം ചെയ്ത പാലത്തിനുള്ളത്. അപ്രോച്ച് റോഡിനായി ചെമ്പ് വില്ലേജിലെ 5.21 ആര് വസ്തുവാണ് ഏറ്റെടുക്കേണ്ടതുണ്ട്. അതിനുള്ള നടപടികളും പുരോഗമിക്കുകയാണ്. കൊച്ചി ആസ്ഥാനമായുള്ള സൈമ ഡൈനാമിക്സ് എന്ന കമ്പനിയാണ് കരാര് ഏറ്റെടുത്തിരിക്കുന്നത്.
ചെമ്പ് പഞ്ചായത്തിന്റെ കാട്ടിക്കുന്ന് തുരുത്തിലേക്ക് പാലം വേണമെന്ന തുരുത്ത് നിവാസികളുടെ ആവശ്യത്തിന് പതിറ്റാണ്ടുകളുടെ പഴക്കമുണ്ട്. പഞ്ചായത്തിലെ 15-ാം വാര്ഡിലാണ് 300 ഏക്കറുള്ള കാട്ടിക്കുന്ന് തുരുത്ത് സ്ഥിതി ചെയ്യുന്നത്. ഇവിടെയുള്ള നിര്ധന കുടുംബങ്ങളിലുള്ള 600ഓളം പേര്ക്ക് പുറംലോകവുമായി ബന്ധപ്പെടാന് കടത്തുവള്ളങ്ങള് മാത്രമാണ് ആശ്രയം. തുരുത്ത് നിവാസികള് അനുഭവിക്കുന്ന യാത്രാദുരതത്തിന് ശാശ്വത പരിഹാരം ആവശ്യപ്പെട്ട് സി.കെ ആശ എംഎല്എ നല്കിയ നിവേദനത്തെ തുടര്ന്നാണ് സംസ്ഥാന സര്ക്കാര് 2019-20ലെ ബജറ്റില് ഉള്പ്പെടുത്തി പാലം നിര്മാണത്തിന് തുക അനുവദിച്ചത്. 2020 ഡിസംബര് 31നാണ് പാലം നിര്മാണത്തിന് ഭരണാനുമതി ലഭിക്കുന്നത്. തുടര്ന്ന് സാങ്കേതികാനുമതിയും നേടി ടെണ്ടര് നടപടികള് പൂര്ത്തിയാക്കി 2022 ഏപ്രില് 28ന് പൊതുമരാമത്ത് വകുപ്പ് മന്ത്രി മുഹമ്മദ് റിയാസ് ആണ് പാലത്തിന്റെ നിര്മാണ ഉദ്ഘാടനം നടത്തിയത്. പാലം പൂര്ത്തിയാവുന്നതോടെ വെളളത്താല് ചുറ്റപ്പെട്ട് കാട്ടിക്കുന്ന് തുരുത്തില് കഴിയുന്ന 125ഓളം കുടുംബങ്ങളുടെ യാത്രാദുരിതത്തിന് ശാശ്വത പരിഹാരമാകുമെന്ന്
സി.കെ. ആശ എംഎല്എ പറഞ്ഞു.