വൈക്കം: വാട്ടര്‍ അതോറിട്ടി വൈക്കം സബ്ഡിവിഷന്റെ ബാങ്ക് അക്കൗണ്ട് മരവിപ്പിച്ചു. വാട്ടര്‍ അതോറിട്ടിയുടെ കീഴിലുള്ള പമ്പ് ഹൗസുകളുടെ വൈദ്യുതി കുടിശിക അടയ്ക്കാത്തതിനാലാണ് അക്കൗണ്ട് റവന്യു വകുപ്പ് മരവിപ്പിച്ചത്. തലയോലപ്പറമ്പ് വൈദ്യുതി സബ്ഡിവിഷന്റെ കീഴിലുള്ള വെള്ളൂര്‍ എരട്ടാണിക്കാവ് പമ്പ് ഹൗസ്, വൈക്കം സെക്ഷന്റെ പരിധിയിലുള്ള തലയോലപ്പറമ്പ് പമ്പ് ഹൗസ് എന്നിവിടങ്ങളിലെ കുടിശിഖകള്‍ ആണ് അടയ്ക്കാത്തത്. രണ്ടു കോടിയോളം രൂപ കുടിശിഖ ഉണ്ടെന്ന് പറയപ്പെടുന്നു. വൈദ്യതി ബോര്‍ഡിന്റെ ആവശ്യപ്രകാരമാണ് റവന്യു വകുപ്പ് നടപടികള്‍ മരവിപ്പിച്ചത്. ഒരു കോടി രൂപയോളമേ കുടിശിഖയുള്ളൂ എന്നും ഒരു കണ്‍സ്യൂമര്‍ നമ്പരില്‍ തന്നെ രണ്ടു തവണ റവന്യൂ നടപടി വന്നതാണ് തുക ഇരട്ടിക്കാന്‍ കാരണമെന്നും വാട്ടര്‍ അതോറിട്ടി അധികൃതര്‍ പറയുന്നു. അക്കൗണ്ട് മരവിപ്പിച്ചിരിക്കുന്നത് വൈക്കം വാട്ടര്‍ അതോറിട്ടി ഡിവിഷനെ കാര്യമായി ബാധിക്കും. അടിയന്തിര ഘട്ടങ്ങളില്‍ അറ്റകുറ്റ പണികള്‍ നടത്താന്‍ കഴിയാത്ത അവസ്ഥയോടൊപ്പം ഓഫീസ് പ്രവര്‍ത്തനം തന്നെ നിലയക്കുമെന്ന ആശങ്കയിലാണ്. വൈക്കം സബ്ഡിവിഷന്റെ കീഴിലുളള നഗരസഭ, വെച്ചൂര്‍, തലയാഴം, ടി.വി പുരം, ഉദയനാപുരം, തലയോലപ്പറമ്പ്, മറവന്‍തുരുത്ത്, ചെമ്പ് പഞ്ചായത്തുകളാണ് പരിധിയില്‍ ഉള്ളത്. 27,000 കണക്ഷനുകളും മൂവായിരത്തോളം പൊതുടാപ്പുകളുമുണ്ട്. ഫയര്‍ഫോഴ്‌സ് ഇപ്പോള്‍ വാട്ടര്‍ അതോറിട്ടി ഓഫീസിനു സമീപത്തു നിന്നുമാണ് വെള്ളം എടുക്കുന്നത്. കരാര്‍ തൊഴിലാളികളുടെ ഒക്‌ടോബര്‍ മാസത്തെ ശമ്പളം അക്കൗണ്ടിലുണ്ട് എങ്കിലും ഇതു വിതരണം ചെയ്യാത്തതില്‍ കരാര്‍ തൊഴിലാളികളും പ്രതിഷേധത്തിലാണ്. കുടിശിഖ അടയ്ക്കാത്ത പക്ഷം ജപ്തി ചെയ്യുന്ന അവസ്ഥയിലേക്ക് റവന്യു വകുപ്പ് മാറുമോ എന്ന ആശങ്കയിലാണ് വാട്ടര്‍ അതോറിട്ടി. സര്‍ക്കാരിന്റെ നയപരമായ തീരുമാനം മാത്രമാണ് ഏക പോംവഴി. അഷ്ടമി കാലം വരുന്നതോടെ വൈക്കത്ത് കുടിവെള്ള വിതരണം നിലയ്ക്കുമോ എന്ന ആശങ്ക ജനങ്ങളിലുണ്ട്.