നിവേദനം നല്കി.
22/09/2017
വൈക്കം: താലൂക്ക് റെസിഡന്റ്സ് അസോസിയേഷന് അപ്പെക്സ് കൗണ്സില് (ട്രാക്ക്) എം എല് എ സി കെ ആശയ്ക്ക് നിവേദനം നല്കി. വൈക്കം സത്യാഗ്രഹ സ്മാരക ഹാളില് നടത്തിയ വികസന സെമിനാറില് ചര്ച്ച ചെയ്യാതെപോയതും വൈക്കത്തിന്റെ സമഗ്രവികസനത്തിന് ഉതകുന്നതുമായ പദ്ധതികള് കൂടി വികസനരേഖയില് ഉള്പ്പെടുത്തണമെന്നാവശ്യപ്പെട്ടുകൊണ്ടാണ് നിവേദനം നല്കിയത്. ബോട്ടുജെട്ടി-ബീച്ച്-ഇന്ലാന്റ് വാട്ടര്വേ-തോട്ടുവക്കം റോഡും പാലവും, തുറവൂര് പമ്പ റോഡിലെ നേരേകടവ്-മാക്കേക്കടവ് പാലം പൂര്ത്തിയാകുന്നതോടെ നേരേകടവ്-ഉദയനാപുരം റോഡ് 15 മീറ്റര് വീതിയില് സ്ഥലം ഏറ്റെടുത്ത് വികസിപ്പിക്കുന്നതിനുള്ള നടപടികള്, വൈക്കം ക്ഷേത്രത്തിന്റെ നാലുഗോപുരങ്ങളില് നിന്നും 100 മീറ്റര് മാറി റിംഗ് റോഡ്, വൈക്കം ടൗണിലെ ഗതാഗതക്കുരുക്ക് ഒഴിവാക്കുന്നതിന് ഏറ്റുമാനൂര്-എറണാകുളം റോഡിലെ ചാലപ്പറമ്പില് നിന്നും വൈക്കം-വെച്ചൂര് റോഡിലെ തോട്ടകം അട്ടാറ വളവിലേക്ക് വൈക്കം ബൈപ്പാസ് റോഡും, ട്രാഫിക് പോലീസ് യൂണിറ്റ് അനുവദിക്കല്, ചെട്ടിമംഗലം പാലനിര്മ്മാണം എന്നിവ കൂടി വികസനരേഖയില് ഉള്പ്പെടുത്തണമെന്നും 2018-19 വര്ഷത്തെ സംസ്ഥാന ബഡ്ജറ്റില് ഉള്പ്പെടുത്തി അംഗീകാരം ലഭിക്കുന്നതിന് വേണ്ട നടപടികള് കൂടി സ്വീകരിക്കണമെന്നും 'ട്രാക്ക്'ആവശ്യപ്പെട്ടു. യോഗത്തില് ട്രാക്ക് പ്രസിഡന്റ് പി ശിവരാമകൃഷ്ണന് നായര് അദ്ധ്യക്ഷത വഹിച്ചു. എം അബു, കെ രഘുനന്ദനന്, കെ ആര് രാജന്, എ ബാബു തുടങ്ങിയവര് പ്രസംഗിച്ചു.